Новости
25 аҧсар ицо агәаларшәагатә банкнота аикәшарахь иҭыҵит
Аҧсны Аҳәынҭқарра Амилаҭтә банк ирыланаҳәоит Аԥсны Аџьынџьтәылатә еибашьраҟны Аиааира 30 шықәса ахыҵра иазку 25 аԥсар ицо агәаларшәагатә банкнота аикәшарахь ишҭыҵыз..
Аикәшарахь алагалара арыцхә: 2023 ш. лаҵарамза 22
Абанкнота ашәагаа: 150 Х 65 мм
Атираж: 15 000 цыра.
«Аҧсны Аҳәынҭқарра адгьылҵакыраҟны агәаларшәагатәи аинвестициатәи монетақәа аикәшарахь ралагаларазы» 21.04.2008 ш аҟнытә Аҧсны Аҳәынҭқарра Азакәан N 2012-с-IV инақәыршәаны агәаларшәагатә банкнотақәа – ақьаад иалхны, апластика хкы ҷыда мамзаргьы урҭ реилаҵарала иҟаҵоу ҧаратә дыргақәоуп.
Аикәшарахь иҭыжьу абанкнотақәа ашәагатә хархәагоуп зхьыӡҳәалатә хәыҧсала аурыс мааҭ аҟны ишьақәырӷәӷәоу аеквивалент змоу: 1 аҧсарк Урыстәылатәи Афедерациа 10 мааҭк иаҟароуп. Убри аан, азакәан инақәыршәаны, абанкнотақәа азаҵә хәаахәҭра асистемаҟны ашәагатә хархәага аҳасабала рхархәара ҟалаӡом.
Аҧхьатәи ахаҿра |
Ашьҭахьтәи ахаҿра |
Абанкнота ахаҿратә ган иану ихадароу асахьа – иҧыруа ахьшьи уи аганҧшрала асахьоуп хыхь ихаргьежьны ианп Аҧсны Аҳәынҭқарра абираҟ аҟнытә быжь-иаҵәак. Асахьақәа арбоуп итрадициатәу аҧсуа орнамент ала.
Арымарахь ашьҭахьтәи аплан аҟны иануп аҧра асахьа. Асахьақәа аҧсуа орнамент аҵаҵаны иаарҧшуп. Аладатәи арымарахьтәи акәакь аҟны иҟоуап аҳәынҭқарратә герб. Аҩадатәи арымарахьтәи акәакь аҟны хыхьынтә ҵаҟа хагәҵәыла ҩ-цәаҳәакны иарбоуп абанкнота шаҟа ицо «25» аҧсар ҳәа.
Абанкнота ашьҭахьтәи ахаҿраҟны ихадароу сахьаны иануп – аҧсуа еибашьцәа. Акомпозициа ақәыҧшылараҟны аҧсуа орнамент ануп. Ашьҭахьтәи аган аҿы еиҭа аеҵәақәа быжьбеи арӷьарахьтәи акәакь аҟны абанкнота шаҟа ицо «25» аҧсари ануп.
Абанкнота ашьҭахьтәи аган аҿы иануп ҩ-сериатә номерки ҩ-нбанк рыла иарбоу асериеи жә-цифрак рыла ишьақәгылоу аномери. Арымарахьтәи аномер уаҧхьоит абанкнота аурала, арыӷьарахьтәи – икьаҿу аган ала.
Аладатәи арӷьарахьтәи аган аҟны абанкнота ашьҭахьтәи ахаҿраҿы иарбоуп QR-код, абанкнота ахьчагатә ҷыдарақәа рыхҳәаа зцу Аҧсны Абанк асаит адаҟьахь азхьарҧш азырбо.
Абанкнота ахьчагатә ҷыдарақәаны иҟоуп: азеиҧштә ӡтәы дыргеи ахьчагатә хацхәқәеи ҩ-хкыкны, зыҧшшәыеиҭаҵуа ахьчагатә елемент «НМС».
Абанкнота нагӡоуп ашьацҧшшәы-ашкәакәахәашьи рыла абамба қьаад шкәакәа иалхны.
Автор: Баҭал Џьапуа.