Новости

Аҧсны Амилаҭтә банк Гонконг Жәларбжьаратәи анумизматикатә конвенциаҟны

05-07-2018 16:56

Лаҵарамза 29 инаркны рашәарамза 1-нӡа Аҧсны Аҳәынҭқарра Амилаҭтә банк Гонконг имҩаҧысуаз есышықәсатәи Жәларбжьаратәи анумизматикатә конвенциа иалахәын.

HKINF – Азиа имҩаҧысыз, адунеи зегьы аҟнытә аукционтә ҩнқәа, акредиттә еиҿкаарақәа, хазхаҭалатәи аколлекционерцәа еидызкыло нумизматикатә хҭыс дуӡӡоуп.

Амилаҭтә банк аҭӡанҵаҟны ицәырган Аҧсны аҳәынҭқарратә дырга, агәаларшәагатә инвестициатә монетақәа, англыз бызшәала иҭыжьу агәаларшәагатә инвестициатә монетақәа раҧхьатәи ркаталог, аӡыргаратә цәыргақәҵаратә материалқәа.

Убри инаваргыланы, аконвенциа аофициалтә каталог аҟны икьыҧхьын Аҧсны Аҳәынҭқарра Амилаҭтә банк аемиссиатә усура нарҭбааны изныҧшуа астатиа.
Ҳазҭагылоу аамҭазтәи аполитикатә ҭагылазаашьа азгәаҭаны, ареспублика ахьӡала иқәгылаз Аҧсны Абанк Жәларбжьаратәи анумизматикатә цәыргақәҵа дуқәа ралархәра егьырҭ атәылақәа, абанкқәа - ҳәаақәҵаҩцәа, амонетатә шҭақәа инараҟараны ихьыҧшым емиссиатә центрк аҳасабала ахцәыргара ахьауа лшара заҵәыкны иҟоуп.
Аҧсны Абанк 2016 шықәса раахыс есышықәса Жәларбжьаратәи Аконвенциеи Амонетақәа рцәыргақәҵа «Coins»-и ирылахәуп, иахьа аихьӡарақәа амоуп урыстәылатәи анумизматикатә џьармыкьаҟны.

Азиатәи арегион Амилаҭтә банк азы иҿыцу хырхарҭоуп, уснагӡатә хадангьы иҟан ари аџьармыкьаҟны ахцәыргара. Азиатәи аџьармыкьа ирццакны аҿиара иаҿу, аҭира дуқәа змоу ҳәа иҧхьаӡоу нумизматикатә ҭыҧ дуӡӡоуп. Уи аҧсуа монетақәа рыларҵәара аганахьала азҿлымҳара ду аҳҭоит.

Аҧсны Абанк злахәыз аҵыхәтәантәи жәларбжьаратәи ацәыргақәҵа мҩаҧысуан ЕАА рыҟны Ниу-Иорк ақалақь аҿы. Иааизакны, зҿлымҳара ду роуит амонетақәа рыдагьы, ҳреспублика иазкыз аинформациа, уи абанктәи, аемиссиатәи усура.

Ас еиҧш иҟоу аусмҩаҧгатәқәа рылахәра Аҧсны Абанк аусура арҭбаара алзыршо аустә еимадарақәа риуразы ҭагылазаашьа бзиоуп. Ҷыдала, гонконгтәи ацәыргақәҵа аҳәаақәа ирҭагӡаны, иалыршан аусеицура ахьымҩаҧысуа амонетатә шҭақәеи Аҧсны Абанки реилаӡарақәа.

Ҽаантәи ашықәс азы иазҧхьагәаҭоуп Европа анумизматикатә цәыргақәҵа ду аҽалархәреи европатәи аџьармыкьахь ацәырҵреи.

Ацәыргақәа афото>>