Новости

Аҧсны Аҳәынҭқарра Амилаҭтә банк иҭнажьыз агәаларшәагатә монета «Аиааира 75 шықәса ахыҵит» амонетақәа XV жәларбжьаратәи реицлабра «Амонетақәа рыеҵәаџьаа» аҟны аноминациа «Иреиӷьу асахьаркыратә ӡбамҭа» аҿы аҩбатәи аҭыҧ ааннакылеит.

«Амонетақәа рыеҵәаџьаа» – Урыстәыла адгьылҵакыракны агәаларшәагатә монетақәа ирызку зыда ыҟам жәларбжьаратәи конкурсуп. Акыр шықәса раахыс имҩаҧысуа, адунеи аҟны еицырдыруа аицлабрақәа ируакны иҟалеит. Аицлабра аиҿкааҩыс иҟоуп   Аҭыжьырҭатә ҩны «Уотер Марк».

2021 шықәсазы «Амонетақәа рыеҵәаџьаа» иалахәу рыҩныҵҟа иҟоуп: ART MINT (Франциа), Венгриатәи амонетатә ашҭа, Италиатәи амонетатә шҭа, Акралтә монетатә шҭа, Австралиа амонетатә шҭа, Нидерландаа рмонетатә шҭа, Польша амонетатә шҭа, Парижтәи амонетатә шҭа, Литватәи амонетатә шҭа, Бельгиа амонетатә шҭа, Канада Акралтә монетатә шҭа, Швеицариа Афедералтә монетатә шҭа, Алада-Африкатәи монетатә шҭа; Урыстәылатәи Афедерациа Абанк хада, Латвиа Абанк, Израиль Абанк, Польша Абанк, Аԥсны Аҳәынҭқарра Амилаҭтә банк, Венгриа абанк уҳәа уб.егь.

Аҧсны Агәаларшәагатә монета Аҧсны Аџьынџьтәылатә еибашьраҟны Аиааира 75 шықәса ахыҵра иазкуп. Уи авторс дамоуп асахьаҭыхҩы Баҭал Џьапуа, амонета чаҧоуп москватәи Гоздырга амонетатә шҭаҟны.

Амонета ареверс аҟны хархәара аҭоуп 1942 шықәсазы Севастополь амҵан фырхаҵарыла иҭахаз Алексеи Аршба ифотосахьа зку ан - аҧсуа ҧҳәыс Марушьа ҧачлиа лсахьа зну арратә фоторепортиор С. Коротков иҭыхымҭа «Ан».