Аҧсны Аҳәынҭқарра аҧара-кредиттә система аиҕьтәра хықәкыс иҟаҵаны, Аҧсны Абанк аҟны иаҧҵахоит Амилаҭтә банктә хеилак, уи шьақәгылоуп Аҧсны Аҳәынҭқарра Ахадеи, Аҧсны Аҳәынҭқарра Жәлар Реизареи, Аҧсны Аҳәынҭқарра Аиҳабыреи. Аҧсны Абанки, акредиттә еиҿкаарақәеи, иара убас аекспертцәеи рхаҭарнакцәа рыла.

Амилаҭтә банктә хеилак хантәаҩыс дамоуп Аҧсны Абанк Ахантәаҩы. Амилаҭтә банктә хеилак аилазаара иалоуп Аҧсны Аҳәынҭқарра Ахада, Жәлар Реизара рҟнытә аӡәаӡәа, иара убас Аҧсны Аҳәынҭқарра афинансқәа р-Министр, Аҧсны Аҳәынҭқарра аекономика Аминистр. Аҧсны абанктә хеилак егьырҭ алахәылаҩцәа аханаргылоит Аҧсны Аҳәынҭқарра Жәлар Реизара, Аҧсны Абанк Ахантәаҩы инашьҭрала. Амилаҭтә банктә хеилак аилазаара ахыҧхьаӡара 9-ҩык иреиҳамзароуп.

Амилаҭтә банктә хеилак аилатәарақәа мҩаҧыргоит шықәсык ахьтә хынтә иреиҵамкәа.

Амилаҭтә банктә хеилак инанагӡоит абарҭ афункциақәа:

          • иахәаҧшуеит Аҧсны Аҳәынҭқарра абанктә система аиҕьтәра аконцепциа;

          • иахәаҧшуеит иаку аҳәынҭқарратә ҧара-кредиттә политика ахырхарҭа хадақә рпроектқәа, авалиутатә ҭышәынтәалареи авалиутатә контроли рполитика, иҟарҵоит алкаақәа, урҭ рынагӡара алҵшәақәа анализ рзыҟанаҵоит;

         • инанагӡоит азакәанҧҵаратә проектқәеи, абанктә ус аусхки рҟны егьырҭ анормативтә актқәеи рекспертиза;

         • иахәаҧшуеит акредиттә еиҿкаарақәа русура арманшәалараҿы реиҳа ихадароу азҵаарақәа;

         • аҽаланархәуеит Аҧсны Аҳәынҭқарраҿы аҳасабкрақәа рсистема аиҿкаашьа апринцип хадақәа аус рыдулараҿы.